വെറുപ്പ്,
എനിക്ക് എന്നോട് തന്നെയാണ്
ഉള്ളിലൊരു
പുഴ വറ്റിയിട്ടും
ചെറുമീനുകള് മരിച്ചിട്ടും
ചിന്തകള്
ഗുഹതേടി
ഇരുള്യാത്ര നടത്തുന്നു.
ചാരത്തില് നിന്നുയിര്ത്ത
വരണ്ട കാറ്റ്
ഹൃദയവാതിലുകള് മുട്ടുന്നു.
മരണവെടി പൊട്ടി
പന്നിപ്പുകയില് ശ്വാസം മുട്ടിയ
കുരുന്നുകളെ
ദൈവം രക്ഷിക്കട്ടെന്ന് !
നാണമില്ലേടോ ?
ദുരന്തം കനക്കുമ്പോള്
ദൈവം തേങ്ങയില്
വെള്ളം നിറക്കുകയായിരുന്നു.
വെറുപ്പ്,
എന്നോട് തന്നെയാണ്,
ഒക്കെ കണ്ടിട്ടും
വിഷുവിന്
കരിമരുന്ന് വാങ്ങിയതിന്.
ദൈവത്തെ പിന്തുണച്ചതിന്.
ഞാന്
ഇരുള്യാത്രയിലാണ്
കണ്ണിനും കാതിനും
മണിച്ചിത്രത്താഴിട്ട്
മൂക ദേശാടനത്തിന്.
ക്ഷമിക്കുക !
(പുറ്റിങ്ങല് അപകടം നടന്നപ്പോള് എഴുതിയത്, 12/04/2016 )
©രാകേഷ് രാഘവന്
