ഇവിടെ,
എനിക്കും നിനക്കും വേനല്‍ വരും.
അടരറ്റു വീണു നമ്മ-
-ളുടലാകെ നിറം മങ്ങി,
വേദനകള്‍ ഘനീഭവിച്ച്, മൂര്‍ച്ഛിക്കും !
കാറ്റിനെയും മഴയേയും പ്രണയിച്ച
തീക്ഷ്ണ യൗവനവും
നിഴല്‍ ചിത്രം വരഞ്ഞു
പൊട്ടിച്ചിരിച്ച ബാല്യവും,
ജീര്‍ണ്ണമനതാരിലോരോ കടവുകള്‍
ശിഥിലമാക്കി ശിക്ഷിക്കും !
വേനല്‍ വരും !
മനസ്സ് മരവിച്ച്
ചിന്തകള്‍ വിണ്ടുകീറും,
ഹൃദയം വരള്‍ച്ചയാ-
-ലിത്തിരി പ്രണയം തേടിയലയും !
ഇന്ന് ഞാനും നീയു-
-മുടല്‍ സ്വര്‍ഗ്ഗം പുല്‍കും,
സ്ഖലിച്ചും വിയര്‍ത്തും
ആനന്ദലബ്ദി പൂണ്ടുറങ്ങും !
- രാകേഷ് രാഘവന്‍
No comments:
Post a Comment