മനസ്സ്:
കഴിഞ്ഞ ദിവസം കടം വാങ്ങിയ
മനസ്സ് എന്നെ ചതിച്ചു.
ഒരു പെണ്ണിന്‍റേതായിരുന്നു,
അര്‍ദ്ധരാത്രിയില്‍ പീഢിപ്പിക്കപ്പെട്ടത്.
ഇപ്പോള്‍,
എല്ലാ രാത്രിയിലും
ഞാന്‍ നീറുന്നു, പുളയുന്നു...
ഗുഹ്യഭാഗത്ത് കത്തിച്ച മെഴുകുതിരി
എന്നില്‍ എരിഞ്ഞ് കൊണ്ടിരിക്കുന്നു.
പീഢിപ്പിക്കപ്പെട്ട ആത്മാവേ
നീ എന്നില്‍ കൂടി വേദനിക്കുന്നു.
മനസ്സേ, നീ എന്നെ
കാര്‍ന്നു തിന്നുന്നതിനു മുന്നേ പോവുക,
പോയി സംഹാരതാണ്ഡവമാടുക...!
പാനീയം:
നിന്നെ നനയിച്ചത് പാതിരാമഴയല്ല,
എന്‍റെ രക്തം.
കറ പുരണ്ട വടിവാളുമായ്
കാലം മലമുകളിലേക്ക്.
അവിടെയെന്നെ കുരുതി കൊടുക്കാന്‍ കാത്തിരുന്ന
കാലന്‍ കോഴിക്ക് നിരാശ.
രക്തത്തിന്‍റെ ചൂടും ചൂരും നഷ്ടമായതിനാല്‍
വീഞ്ഞില്‍ ഇനി മനുഷ്യനു പാനീയം...!
--രാകേഷ് രാഘവന്‍
No comments:
Post a Comment